ကိုးရီးယား စကား ပြောရအောင်....

ရေးသားသူ — ညီဇေ
ကိုရီးယားလို ကျွမ်းကျွမ်းကျင်ကျင် တတ်ရင်ကောင်းမှာပဲလို့ စိတ်ကူးကြတဲ့သူတွေ များပါတယ်။ တစ်ချို့ လည်း ဘာသာစကားကို တစ်ကယ်စိတ်ဝင်စားလို့ ၊ တစ်ချိုလည်း လုပ်ငန်းခွင်အခက်အခဲနဲ့ လူမူရေးအခက်အခဲလေးတွေ ပြေလည်ချင်လို့ ၊ တစ်ချို့ လည်း နီးစပ်ရာ ကကြီးမလေးတွေနဲ့ ပွားချင်လို့... စသဖြင့် စိတ်ကူးမျိုးစုံပါပဲ ။ ဒါပေမယ့် လက်တွေမှာတော့ ကြိုးစားအားထုတ်မှု လျှော့နည်းလို့၊ ဘာသာစကားအပိုင်းမှာ တော်တော်လေး အားနည်းနေတာကို တွေ့ရပါတယ်။ ဘာသာစကားတစ်ခုကို လေ့လာတယ်ဆိုတာ.....

ကောက်ရိုးမီးလို နှစ်ရက်၊ သုံးရက်လောက် နေ့မအိပ်၊ ညမအိပ် ကြိုးစားရုံနဲ့ ကျွမ်းကျင်တာမျိုးမဟုတ်ပါဘူး။ ဒါနဲ့ ပါတ်သက်ပြီးတော့ စာသားလေးတစ်ခုကို သတိရမိတယ်ပါတယ်။ သင်ယူလေ့လာမူနဲ့ ပတ်သက်ပြီး လမ်းညွှန်ထားတာလေးပါ ။ အဲဒါကတော့ "နှေးမှာကို မကြောက်ပါနဲ့၊ ရပ်တန့်သွားမှာကိုပဲ ကြောက်ပါ" တဲ့။ လေ့လာမှုဆိုတာ နှေးနှေးနဲ့ မှန်မှန် အားထုတ်သွားရတာမျိုးပါပဲ။ သေချာတာတစ်ခုကတော့ ရှိပါတယ်။ ဘယ်ပညာရပ်မျိုးကိုမဆို မိမိကိုယ်တိုင် ကြိုးစားအားထုတ်မှုတစ်စုံတစ်ရာ မရှိပဲနဲ့တော့ မတတ်ကျွမ်းနိုင်ဘူးဆိုတာပါပဲ။ အခြားသူက လမ်းညွှန်ပေးရုံလောက်ပဲ တတ်နိုင်ပါတယ်။ ဒါကြောင့် တစ်ကယ်တတ်ကျွမ်းချင်ရင် တစ်ကယ် ကြိုးစားအားထုတ်ပါလို့ တိုက်တွန်းချင်ပါတယ်။ တစ်ကယ် ကြိုးစား အားထုတ်ချင်ပါတယ်၊ ဒါပေမယ့် ဘယ်က စပြီး လေ့လာရမှန်း မသိဘူးဆိုတဲ့ သူတွေအတွက် လေ့လာထားတာလေးတွေနဲ့ သင်ကြားခဲ့၊ သင်ယူဖူးခဲ့တဲ့ အတွေ့ အကြုံလေးတွေကို တင်ပြပေးသွားမှာ ဖြစ်ပါတယ်။ ကိုရီးယားဘာသာကို လေ့လာကြရာမှာ အခြေအနေနှစ်မျိုး ရှိပါတယ်။ ကိုရီးယားကို မရောက်ခင် လေ့လာခဲ့တာနဲ့၊ ကိုရီးယားကိုရောက်ပြီးမှ လေ့လာတာပါပဲ။ ကိုရီးယားစာကို အခြေခံသင်ယူပြီးမှ ရောက်လာတဲ့သူတွေလည်း ရှိပါတယ်။ ကိုရီးယားမရောက်ခင် လေ့လာခဲ့ကြတဲ့ သူတွေကတော့ စာဖက်အားသန်ပြီးတော့ စကားဖက်မှာ အားနည်းတတ်ကြပါတယ်။ ဒါကြောင့် စကားကို မရှက်မကြောက်နဲ့ ရဲရဲဝံ့ဝံ့ပြောဆိုပြီး လေယူလေသိမ်း၊ အသံအပြောင်းအလဲလေးတွေကို သတိပြု လေ့လာသွားရင် အခက်အခဲမရှိ ကျွမ်းကျင်သွားမှာပါ။ ဒါပေမယ့် ကိုရီးယားစာကို အတိုင်းအတာတစ်ခုအထိ လေ့လာခဲ့ပေမယ့် စကားပြောတဲ့အခါ စာအတိုင်း ပြောသလိုဖြစ်နေလို့ ကကြီးသား နားမလည်ဖြစ်တာမျိုးလည်း ရှိပါတယ်။ တစ်ချို့ လည်း ငါက စာအတိုင်းပြောတာ၊ ငါပြောတာ အမှန်လို့ ထင်ကြတဲ့သူတွေလည်း ရှိပါတယ်။ ဒါဆိုရင်တော့ စံသတ်မှတ်ထားသော အသံထွက်ဆိုနည်းစနစ်(표준 바름법)နဲ့ဆိုင်တဲ့ စာအုပ်လေးကို ရှာဖွေ လေ့လာကြည့်ပါလို့ တိုက်တွန်းလိုပါတယ်။ နောက်တစ်ခါ ကိုရီးယားရောက်မှ ကကြီးသားပြောတာကို နားထောင်၊ လိုက် တုပြီး ပြောကြတဲ့သူတွေကတော့ လေယူလေသိမ်း အင်မတန် ကောင်းပြီး ကကြီးသား နားလည်လွယ်တာကို တွေ့ရပါတယ်။ သို့သော် စကားပြောတဲ့အခါ သဒ္ဒါအကျိုးအပျက်တွေနဲ့ ပြောနေမိတော့ မသိတဲ့သူအတွက် ပြဿနာ မရှိပေမယ့်၊ တတ်သိနားလည်တဲ့သူအဖို့တော့ ရယ်စရာ ဖြစ်နေပါလိမ့်မယ်။ ဘာပဲဖြစ်ဖြစ် ကိုယ်ပြောလိုရာကို ပြောနိုင်တယ်ဆိုရင်ပဲ တော်သေးတယ်လို့ ပြောရပါမယ်။ ဒါပေမယ့် အဲဒီလူတွေဟာ စက်ရုံထဲမှာ အလုပ်လုပ်ရင်း ကြားရတဲ့ စကားတွေကို နားထောင်ပြီး လေ့ကျင့်ပြောဆိုတာဆိုရင်တော့ မိမိစက်ရုံထဲမှာ ပြောဆိုတဲ့အခါ ပြဿနာ မရှိပေမယ့်၊ စက်ရုံအပြင်ထွက်တဲ့အခါနဲ့ ရုံးကိစ္စတွေလုပ်တဲ့အခါ၊ လူကြီးလူကောင်းတွေနဲ့ တွေ့ ဆုံပြောဆိုတဲ့အခါမှာတော့ ယဉ်ကျေးမှုမရှိတဲ့သူလို့ အထင်သေး၊ အမြင်သေးခံရပါလိမ့်မယ်။ အထူးသဖြင့် ဖုန်းနဲ့ message ပို့တဲ့အခါ စကားပြောတဲ့ အသံထွက်အတိုင်း ရေးတဲ့အတွက် တစ်ဖက်လူအနေနဲ့ သူ ဘာပြောတယ်ဆိုတာ နားလည်ပေးလို့ရပေမယ့် တစ်ချို့ စကားလုံးတွေမှာတော့ အဓိပ္ပါယ်တွေ အများကြီးဖြစ်နေ၊ အဓိပ္ပါယ်တွေ တလွဲဖြစ်နေလို့ ဘာဆိုလိုတယ်ဆိုတာ နားမလည်နိုင်အောင်ပါပဲ။ ဒါပေမယ့် ကကြီးသားတွေတောင်မှ အသံထွက်အတိုင်း ရေးကြတာ တွေ့ ရပါတယ်။ အသံထွက်အတိုင်း ရေးတယ်ဆိုပေမယ့် သဒ္ဒါနည်းအရ အသံများ ပေါင်းစပ်ထွက်ဆိုတဲ့ အပိုင်းနဲ့ မရောထွေးကြဖို့တော့ လိုပါလိမ့်မယ်။ ဘာပဲဖြစ်ဖြစ် အခု ကိုရီးရောက်နေကြတဲ့ ညီအစ်ကိုတွေကတော့ ကိုရီးယား ယဉ်ကျေးမှု၊ ကိုရီးယား လူမှုဘ၀နဲ့ နေ့စဉ် ထိတွေ့ နေကြရတာမို့လို့ ကိုရီးယားဘာသာကို သင်ယူဖို့ အကောင်းဆုံး အခြေအနေပါပဲ။ ဒီလို အခြေအနေတွေ ရှိပါလျှက်နဲ့ မလေ့လာ၊ မသင်ယူကြရင်တော့ အရမ်းနစ်နာလှပါတယ်။ ကျနော်တို့ ရွှေမြန်မာတွေ တစ်ခြားနိုင်ငံသားတွေနဲ့ ယှဉ်ရင် ကိုရီးယားဘာသာမှာ ကျွမ်းကျင်မှု အရမ်းအားနည်းတာကို ငြင်းလို့မရပါဘူး။ ဘာသာစကားဖွဲ့စည်းပုံအရ ကိုရီးယားဘာသာဟာ မြန်မာစာနဲ့ ဆင်တာမို့လို့ တစ်ကယ် လေ့လာကြမယ်ဆိုရင် ကျနော်တို့လူမျိုးကို တစ်ခြားသူတွေ လိုက်မီမှာ မဟုတ်ပါဘူး။ ဒီနေ့ ကျနော်တို့ အမိနိုင်ငံတော်ကြီးဟာ အစစ အရာရာ အဘက်ဘက်က ယိုယွင်းနေတဲ့တာကို အားလုံးအသိပါပဲ။ ကျန်တဲ့နေရာတွေမှာ ကိုယ်နဲ့မဆိုင်သလို နေနေကြရင်တောင်မှ ကိုယ့်အတွက်ကိုယ်တော့ အရည်အချင်းရှိသူ တစ်ယောက် ဖြစ်အောင်တော့ ကြိုးစားသင့်ပါတယ်။ ကိုရီးယားစာသင်ဖို့ ကိုရီးယားကို လာတာမဟုတ်ဘူးဆိုပြီး ပေါ့ပေါ့တန်တန် မနေကြပါနဲ့။ အခွင့်ရှိခိုက် ဘာသာစကားတစ်ခုကို ကျွမ်းကျင်အောင် အားထုတ်သင့်ပါတယ်။ ဘာသာစကား တစ်ခုကို လေ့လာတယ်ဆိုတာ ဥပမာပြောရရင် ဘာနဲ့တူသလဲဆိုတော့ ရေကူးသင်ရသလိုပါပဲ။ ကိုရီးယားမလာခင် လေ့လာခဲ့တာဟာ တောင်ပေါ်မှာ ရေကူးသင်ရသလိုပါပဲ။ လက်တွေ့ နဲ့ ဝေးပါတယ်။ ဒါပေမယ့် ဆရာကောင်းနဲ့ တွေ့ခဲ့တယ်ဆိုရင်တော့ လက်တွေ့ကူးခတ်တဲ့အခါမှာ အခက်အခဲ ကြီးကြီးမားမား မတွေ့ရပဲ၊ ကူးခတ်ရင်း ကျွမ်းကျင်လာပါတယ်။ ကိုရီးယားရောက်ပြီးမှ သူများပြောတာဆိုတာကို နားထောင်၊ အတုယူပြီး ပြောတာကတော့ ရေနစ်တော့မှ အသက်လုပြီး ကူးခတ်ရသလိုပါပဲ။ အဲ.. ခွေးကူး ကူးတတ်ရင်လည်း အသက်ဘေးက လွတ်နိုင်ပါတယ်။ သက်လုံဆိုတာကတော့ အတွေ့အကြုံပါပဲ။ ဒါပေမယ့် ခွေးကူး ကူးတတ်ရုံလောက်နဲ့တော့ ရေကူးပြိုင်ပွဲဝင်ပြီး ဆုတံဆိပ်ယူဖို့ကတော့ တော်တော်လေး ကြိုးစားအားထုတ်မှ ဖြစ်နိုင်မှာပါ။ သို့သော်လည်း အစမှာ အသက်လု ကူးခတ်ရင်းက စနစ်တကျ လေ့လာသွားလို့ စာတွေ့၊ လက်တွေ့ ကျွမ်းကျင်ပြီး လူပုံအလယ်မှာ ထည်ဝါနေတဲ့ ကိုရီးယားဘာသာ ကျွမ်းကျင်သူ လူတော်တွေလည်း ရှိပါတယ်။ သူတို့တွေရဲ့ အားထုတ်မှုကို အသိအမှတ်ပြု၊ အားကျ၊ အတုယူကြရမှာပါ။ သို့သော် ကိုရီးယားရောက် မြန်မာလူဦးရေနဲ့ နှိုင်းယှဉ်ရင် လက်ဆယ်ချောင်းတောင် မပြည့်လို့ ၀မ်းသာရမလို၊ ၀မ်းနည်းရမလိုပါပဲ။ ဒါကြောင့် ဒီအချိန်ကပြီး ရှေ့ ဆက်ရေးမယ့် သင်ခန်းစာလေးတွေကို နည်းနည်းချင်း လေ့လာသွားကြပါလို့ တိုက်တွန်းပါရစေ။ တစ်ခုတော့ ကြိုတင်ပြီး တောင်းပန်ထားပါရစေ။ စာရေးသူလည်း တော်လှ၊ တတ်လှလို့ ဆရာကြီးလုပ် ရေးတယ်လို့ မထင်ပါနဲ့။ ကိုယ့်လူမျိုးတွေ သူများနဲ့ ယှဉ်ရင် အောက်ကျနောက်ကျ မဖြစ်ရအောင်လို့ မပြည့်တဲ့ အိုးလေး ဘောင်ဘင်ခတ်တယ်လို့ နားလည်ပေးကြစေလိုပါတယ်။ ။
ရေးသားသူ — ညီဇေ (http://burmainfokorea.blogspot.com)ဟန်းဂုရွာ မှရယူဖော်ပြသည်။